გურული ვაზისა და ღვინის კლასტერის პრეზენტაცია 26 აპრილს, ჩოხატაურში ივლიტას ბიბლიოთეკაში გაიმართა. მისი დამფუძნებლები ადგილობრივი ღვინის მწარმოებლები არიან და კლასტერის კარი ღიაა ყველა დაინტერესებული სუბიექტისთვის. ორგანიზაციის მისიაა გურული ღვინის გაუმჯობესებული ხარისხი, გაზრდილი წარმოება და ცნობადობა, განვითარებული ღვინის ტურიზმი და ახალი გასაღების ბაზრები.
პრეზენტაციას ესწრებოდნენ ვაზისა და ღვინის წარმოებაში ჩართული ფერმერები და საწარმოები, ადგილობრივი თვითმმართველობა, სამოქალაქო სექტორი და მედია. პრეზენტაციის დასაწყისში პროექტის – „უნარები დასაქმებისა და თანამშრომლობისთვის – პერსპექტივები საქართველოს რეგიონებისთვის“ (SECTORS) – დირექტორმა თამარ ღლონტმა მონაწილეებს პროექტის მიღწევები გააცნო და სექტორთა შორის თანამშრომლობის მნიშვნელობაზე ისაუბრა. უშუალოდ კლასტერის სამომავლო ხედვები და მომდევნო ორი წლის სამოქმედო გეგმა მისმა ერთ-ერთმა დამფუძნებელმა „კობიძეების მარნის“ წარმომადგენელმა, დავით კობიძემ წარმოადგინა. საინტერესოდ ჩაერთო აუდიტორია და ბევრმა გამოთქვა კლასტერში გაწევრიანების სურვილი. გურული ვაზისა და ღვინის კლასტერი დაარსდა პროექტის – „უნარები დასაქმებისა და თანამშრომლობისთვის – პერსპექტივები საქართველოს რეგიონებისთვის“ (SECTORS) – ფარგლებში, რომელიც დაფინანსებულია ევროკავშირის მიერ და ახორციელებს ინოვაციებისა და ცვლილებების ინსტიტუტი დემოკრატიის ინსტიტუტთან, საქართველოს ფერმერთა ასოციაციასა და ასოციაცია „ათინათთან“ პარტნიორობით აჭარაში, გურიასა და სამეგრელოში.
